أول مدونة لي، أتمنى تكون تجربة ممتعة ومفيدة للي يقرأها
ربما يكون في كلامي شيء من سرد قصتي مع الخط العربي، لكن هحاول تكون الحكاية فيها فوايد ونصايح لأي شاب مبتدئ في سني لما بدأت
من صغري وأنا بعشق شكل الحرف، وكتير حاولت أكتب خط حلو ولكن كان خطي سيء للغاية، ورسمي كان أسوأ ما يكون :). صحيح بيقولوا الموضوع بيكون موهبة، لكن في تجربتي مكنتش موهبة أبدا :). كان مجرد حب وشغف غير عادي، وبعدها بدأ التعلم لكن متأخر كتير

يمكنك مشاهدة دورة تعليم فن الخط الديواني أونلاين

 

أمي كانت بتحب ترعى مواهب أولادها، لكن كعادة أغلب البيوت، مفيش اهتمام باكتشاف المواهب، أو معرفة ميول الابن ومساعدته بالشكل الصحيح، ودا علمني إن المستقبل بإيد الشخص نفسه وهو المسئول عن التفتيش في نفسه وميوله وأفكاره وطموحاته
أول ما وجدت ضالتي، لقيت زميل ليا في الإعدادي خطه جميل ومعاه قلم خط عربي وكان بيكتب رقعة جميل، فورا طلبت منه قلم علشان أقلده وأتعلم زيه، بعدها قدرا لقيت دروس الأستاذ خضير البورسعيدي على فضائيات النيل التعليمية، فعلطول قلدت الدروس بتاعته، ولكن نرجع ونقول البيت عامل مهم في رعاية المواهب والميول، لأني كنت بتفرج على الدروس في الخفاء :). ولما أمي تعدي كنت أقلب على أي درس على قنوات النيل التعليمية :).
أمي كانت بتشجعني جدا إن أتعلم أي شيء وممارسة أي نشاط، لكن دون المساس بالدراسة :). الأزمة اللي أفشلت قطاع كبير من الشباب، الدراسة والمجموع أهم من مستقبلك (!). كان ممكن بكل بساطة التوفيق بين المذاكرة وممارسة أي نشاط، ولكن الحرص الشديد على إني أجيب مجموع كبير هو اللي خلاني أجيب 61% في الثانوية العامة :D.
اتعلمت إن مستقبلي أنا اللي أحدده مش غيري، وقراري بإيدي لأني أدرى بنفسي، وكنت مهتم جدا بقراءة كتب في علم النفس وأنا في إعدادي، خصوصا كتاب “سيكولوجيات” ليوسف ميخائيل، اللي عرفت منه ازاي أدرس شخصيتي كويس، وأطور وأعالج من نفسي بنفسي
المهم عرفت طريق الأقلام البوص والحبر من خطاط جاري بالمنطقة، وعرفت كمان إن الخط دا حاجة بتدرس :). وكمان ليه مدرسة حكومية وليه كتب كمان، وسبحان الله الموضوع ماشي بالترتيب، أقابل زميل معاه قلم خط عربي، أشتريه وأفتح التلفزيون ألاقي الأستاذ خضير بيشرح خط، بعدها أقابل خطاط جاري من تلاميذ الأستاذ خضير، بعدها علطول معرض الكتاب ♥
وكنت بخبي البوص والحبر في الدرج، وكان أخويا بيذاكر معايا في نفس الغرفة، لما يطلع برا، أفتح أنا الدرج وأكتب شوية، ولما يدخل أقفل الدرج تاني .:)
كنت بحاول أعلم زمايلي في الإعدادي، وزعت أقلام بوص وحبر على نصف الفصل تقريبا، وأسعد جدا لما أقابل حد منهم دلوقتي ويقولي أنا فاكر لما كنت بتعلمنا، أو اللي يقولي أنا لسه محتفظ باسمي اللي أنت كتبتهولي لحد دلوقتي ♥
دخلت الثانوية، وإذ بمدرستي بها مدرسة الخطوط العربية، اشتركت فيها، وكنت لما أخلص اليوم الدراسي أحضر حصص مدرسة الخط

يمكنك مشاهدة دورة تعليم فن الخط الديواني أونلاين

 

التقيت بخطاط محترف، طلب مني إنه يعلمني ويخليني أشتغل خطاط ، هو اللي طلب :). حبيبي وأستاذي الأستاذ فرج سعيد. بالفعل اشتغلت معاه واتعلمت وبدأ الشغل يجيلي بالفعل وهو يساعدني بكل إخلاص
بالنسبة للدراسة، فمكنتش أعرف عنها شيء :). كنت طول اليوم الدراسي في حوش المدرسة أكتب على أسوارها، وأتنقل داخل المدرسة كلها وأكتب على الجدران، وأكتب اللوحات الإرشادية لأي مدرس أو مدير أو قسم، كنت خطاط المدرسة، لا أعلم عن المناهج شيئا ، أروح الصبح في أي وقت، وأمشي في أي وقت، مش فاضي بقى .:)
علشان كدا كنت فاشل في الدراسة، لحد ما دخلت المعهد العالي للغات والترجمة، وبدأت أذاكر بحب بقى :)، الحمد لله في السنة الأولى كنت العاشر عالدفعة، بعد عناء طويل مع طلبة من مدارس لغات، والسنة التانية كنت الخامس عالدفعة، والسنة التالتة ولا أي حاجة :). اشتغلت خطاط في قناة المجد الفضائية، وتركنا الدراسة تاني بعد حلم لمدة سنتين أكون مترجم ومصحح لغوي، بعد التأثر بالدكتور محمد عناني عضو المجمع اللغوي، وبعد التأثر والتعايش مع الأدب الإنجليزي، واللغة العربية وقضاياها
بعد أن كان همي من هم حافظ إبراهيم: أنا البحر في أحشائه الدر كامن ** فهل سألوا الغواص عن صدفاتي‏
عدت للخط العربي ولكن بشكل جديد، في بيئة فنية من الزملاء الأعزاء الذين أحفظ لكل واحد منهم جميله علي
ورحلة ممتعة مع أستاذي الأستاذ محمد أبو قمر وتاج راسي الأستاذ مصطفى عمري، والأستاذ إبراهيم أبو طوق والأستاذ أحمد فارس… تشكيلة جميلة من الأساتذة أثروا في شخصيتي
أنا حريص جدا لمساعدة أي محب أو مبتدئ في تعلم الخط، أرحب جدا بأي مساعدة، موجود طول الوقت جاهز لاستقبال أي أسألة أو محاولات خطية أقدر أفيد من يرسلها لي
حلمي إن شاء الله بإنشاء مدرسة للخط العربي، وكذلك مدرسة خط أونلاين، رسالتي إني أنشر فن الخط في كل مكان والتعريف بيه ومساعدة من يريد
هكون سعيد جدا بتلقي أسألتكم على الإيميل

[email protected]

يمكنك مشاهدة دورة تعليم فن الخط الديواني أونلاين

 

عبد الغني شعير

16 Comments. Leave new

عبد الرحمن
March 14, 2014 4:58 am

ما شاء الله، قصة ممتعة، زادك الله من علمه

Reply

تباركَ الله / نموذج مُشرّف بحقّ .. زادكُم الله من فضله :’)

فكرة المدونة جميلة .. خاصّة للتوثيق.
فقط أقترح تغيير نوع الخط، وتعديل قالب المدونة.
كذلك تنسيق الخطّ.. له دور مُهمّ لشدّ القارىء للقراءة بسلاسة.
لكن عامّة المدونة جميلة .. ما شاء الله.
حقق الله أحلامكم .. وجعلها خالصة لوجهه الكريم.
وجعلها واقع يُلمس، ويَسري نَفعه ليوم الدين.

Reply

    للأسف مفيش تغيير الفونت أو تكبير الحجم

    هحاول أستعين بحد متخصص

    Reply

بص هو انا مكنتش متأكد .. بس كنت شاكك 😀

Reply

قصة مميزة وفقك الله لما يحبه ويرضي.

Reply
عبدالله
March 15, 2014 12:27 am

بارك الله فيك وجزاك عنا خير الجزاء يا أخ عبدالغني

Reply

    أنت بتتكلم كدا ليه يا عبدالله؟ اتكلم بطبيعتك أحسن

    😀 😀 😀

    Reply
عبدالله
March 15, 2014 12:34 am

أصلي اتأثرت أوي وأنا لما بتأثر تلاقيني بتكلم كده

Reply
احمد رمضان
January 5, 2016 10:56 am

يعنى عايز اقول حاجات كتير عجبتنى بس هيقى كلام كتير ….. لو اختصرت هيكون ( دا سر كل جميل ) دمت جميلا

Reply
محبة للخط العربي ^^
March 3, 2016 9:26 am

ما شاء الله, قصة رائعة ومميزة 🙂
بارك الله لك في وقتك وعملك.

Reply
مختار صالح
October 11, 2016 11:37 am

ما ذكرت ليه مدرسة الخط والمغامرات اللي خضناها مع بعض مع الاستاذ عبد العليم

Reply

ماذكرتش ليه مدرسة الخط والمغامرات اللي خضناها مع بعض والاستاذ عبد العليم وفشانا برضو

Reply

Leave a Reply

Your email address will not be published. Required fields are marked *

Fill out this field
Fill out this field
Please enter a valid email address.
You need to agree with the terms to proceed

Menu
Share This